Yaradıcılıq, texnologiya və startap sahələri üzrə gündəmdə olan xəbərləri buradan izləyə bilərsiniz. Bu günün xəbərləri ilə qarşınızdayıq, xoş oxumalar!
iPhone SE 4 2025-ci ildə iPhone 14 dizaynı ilə gələcək
Mark Qurmanın paylaşdığı məlumatlara əsasən, "Apple"ın 2025-ci ilin əvvəlində təqdim edəcəyi iPhone SE 4 modeli iPhone 14 ilə oxşar dizayna sahib olacaq. OLED ekrandan (ehtimal ki, 60 Hz) istifadə edəcək cihaz "Apple Intelligence" funksiyalarını təklif edə bilər.
Onun qiyməti təxminən 430 dollar və ya 500 dollardan aşağı olacaq. Face ID və eyni zamanda USB-C portu olacaq telefona, iPhone 15 modellərindəki fəaliyyət düyməsinin də əlavə olunacağı gözlənilir.
“Galaxy Ring” digər telefon modellərində də problemsiz işləyib
"Samsung"un ağıllı üzük bazarında ilk addımı olan "Galaxy Ring" satışa çıxarıldığı gündən texnologiya həvəskarlarının diqqətini çəkib. Məlum olub ki, şirkətin əvvəlcə yalnız "Galaxy" telefonları üçün nəzərdə tutduğu bəzi funksiyalar "Motorola Razr Plus" və "OnePlus 12" kimi modellərdə də problemsiz işləyib.
Everest dağındakı zibil problemini həll etmək üçün dron istifadə olunacaq
Everest dağı hər il yüzlərlə alpinistin buraxdığı zibillə getdikcə "Dünyanın ən yüksəkdəki zibilliyinə" çevrilir. Bu ekoloji problemin həlli olaraq Çinli dron istehsalçısı "DJI"nin xüsusi dronlar hazırladığı iddia edilib.
Nepal hökuməti alpinistlərin illik 50 tonluq zibil yükünü azaltmaq üçün DJI-nin ağır yük daşıyan dronlarından istifadə etməyi planlaşdırır. Şerpa xalqının səyləri kifayət etmədikdə, bu yeni texnologiya həlli daha da vacib olub. "DJI" aprel ayında Everestdə ilk sınaq uçuşunu həyata keçirib və tək pilotsuz təyyarə bir saat ərzində iki bölgə arasında 225 kiloqram zibil daşıya bilib. Bu dronların istifadəsi Everestdəki zibil problemini yüngülləşdirmək üçün potensial həll yolu kimi qiymətləndirilir.
Elon Musk "Grok 2"nin sınaq versiyasını elan edib
Elon Musk "X"də verdiyi açıqlamada "Grok 2" AI modelinin test versiyasının tezliklə satışa çıxarılacağını açıqlayıb. "Grok 2" əvvəlki versiyalarla müqayisədə əhəmiyyətli təkmilləşdirmələri ehtiva edir. Musk həmçinin "Grok 3" modelinin ilin sonuna doğru satışa çıxarılacağını və bu modelin "GPT-5" səviyyəsində və ya daha yaxşı performans göstərməsinin gözlənildiyini bildirib.
“Apple” uyğun qiymətli “Apple Vision” üzərində işləyir
"Apple" 2024-cü ilin əvvəlində ABŞ-də 3599 dollardan başlayan qiymətlərlə satışa çıxardığı "Vision Pro" AR eynəkləri ilə böyük diqqət çəksə də, yüksək qiymət və məzmun çatışmazlığı istifadəçiləri narahat edirdi. Son hesabatlar göstərir ki, "Apple" bu vəziyyətdən sonra daha sərfəli "Apple Vision" modeli üzərində işləyir.
Mark Qurmanın sözlərinə görə, "Apple" şirkəti daha ucuz smart eynəklərin hazırlanması üzərində işləməyə başlayıb. Yeni modelin "Vision Pro"dan daha kiçik və daha sərfəli olacağı gözlənilir.
Daha çox
Daily
kateqoriyasından
