Yaradıcılıq, texnologiya və startap sahələri üzrə gündəmdə olan xəbərləri buradan izləyə bilərsiniz. Bu günün xəbərləri ilə qarşınızdayıq, xoş oxumalar!
AZAL loyallıq proqramının yenilənməsini və rebrendinqini başa çatdırıb
Azərbaycanın milli aviadaşıyıcısı "Azərbaycan Hava Yolları" QSC (AZAL) “AZAL Miles” loyallıq proqramının tamamilə yenilənməsini və rebrendinqini başa çatdırıb. Bildirilir ki, aviaşirkət həmçinin qabaqcıl texnologiyalar və xidmətlərin rəqəmsallaşdırılmasını tətbiq etməklə müştərilərin şəxsi kabinetini modernləşdirib.
Bu dəyişikliklər istifadəçilərə unikal imkanlar təqdim edir. Loyallıq proqramının yenilənməsi və şəxsi kabinetin təkmilləşdirilməsi aviaşirkətin daha geniş transformasiya strategiyasının bir hissəsidir. Bu təşəbbüslərin əsas məqsədi xidmət keyfiyyətinin yüksəldilməsi və AZAL-ın beynəlxalq bazarda mövqeyinin möhkəmləndirilməsidir.
Transformasiya çərçivəsində yenilənmiş şəxsi kabinet daha rahat və funksional olub. Rəqəmsallaşma sayəsində sərnişinlər bütün lazımi xidmətləri – aviabiletlərin alınmasından, rezervasiyaların idarə edilməsindən tutmuş millərin idarə edilməsinə qədər – onlayn şəkildə həyata keçirə bilərlər. Şəxsi kabinetdə tətbiq olunan innovativ həllər “AZAL Miles” proqramı ilə qarşılıqlı əlaqəni xeyli asanlaşdırır və xidmətdən istifadəni mümkün qədər rahat və səmərəli edir.
“AZAL Miles” loyallıq proqramının yeni versiyası əvvəlkini əvəz etməklə yanaşı, müştərilərə əvvəl mövcud olmayan imkanlar təqdim edərək funksionallığı və imtiyazları xeyli genişləndirib. Proqramın bütün aspektləri müasir rəqəmsal standartlara uyğun olaraq yenidən işlənib. Proqramın yeni “Fürsətləri səmada tutun” (“More miles, more skies”) şüarı onun müasir səyahətçilərin ehtiyaclarına yönəlmiş yenilənmiş sistem kimi statusunu vurğulayır.
Proqramın əsas yeniliklərinə aşağıdakılar daxildir:
- İmtiyazların sayının artması;
- Millərin sürətli toplanması və istifadəsi;
- Eksklüziv təkliflərə çıxış;
- “Classic”, “Gold” və “Platinum” statuslarına əlavə olaraq iki yeni status – “Silver” və “Elite” tətbiq olunub.
Proqramın bütün statusları üzrə imtiyazlarına aşağıdakılar daxildir:
- Ön və geniş oturacaq seçimləri;
- Ödənişsiz baqaj;
- Sürətli keçid;
- Biznes zala pulsuz giriş;
- Xidmət sinfinin ödənişsiz yüksəldilməsi;
- Mükafatlandırıcı aviabiletin tarixinin cəriməsiz dəyişdirilməsi;
- Prioritetli qeydiyyat və təyyarəyə minik;
- Prioritetli baqaj daşınması.
“AZAL Miles”ın əsas xüsusiyyətləri:
- Ailə hesabı: ailə üzvlərinə millərini bir hesabda toplamaq imkan yaradır;
- Mükafatlandırıcı aviabilet: artıq mil ilə bilet satılan istiqamətlər üzrə mükafatlandırıcı aviabiletlərə limit tətbiq olunmur;
- Millərin köçürülməsi: proqram iştirakçıları milləri bir-birilərinə köçürə biləcəklər;
- Millərin alışı: iştirakçılar həm özlərinə, həm də digər iştirakçılar üçün ödənişli şəkildə millər ala bilərlər;
- Status ballarının alışı: istifadəçilər statuslar üzrə müəyyən tələblərdən sonra ödənişlə status ballarını ala bilərlər;
- Millərin status ballarına çevrilməsi: əlavə imtiyazlar və daha çox ölkəyə uçmaq imkanı əldə etmək üçün yeni funksiya;
- Müddəti bitmiş millərin bərpası: iştirakçılar müddəti bitmiş milləri müəyyən şərtlərlə bərpa edə bilərlər.
Yenilənmiş proqramda iştirakçılarımız üçün hədiyyələr də hazırlanıb. Belə ki, ilk uçuş və hər bir yeni statusa keçid zamanı “Xoş gəldin” milləri, eləcə də doğum günü milləri təqdim edilir.
Dəyişikliklər zamanı aşağıdakı güzəştlər tətbiq edilib:
1. Bütün iştirakçıların milləri bitmə müddətindən asılı olmayaraq 2027-ci ilin avqust ayına qədər 3 il müddətinə uzadılıb.
2. Status balları üçün son 12 ay deyil, son 20 ay ərzində həyata keçirilən uçuşlar nəzərə alınıb.
3. Yeni proqram istifadəyə verilən gündən sonra uçuş edən hər bir iştirakçıya 300 “Xoş gəldin” mili hədiyyə edilir.
4. Heç bir uçuş etməyən əvvəlki “Gold” statuslu iştirakçılar ən azı “Silver”, “Platinum” statuslu iştirakçılar isə ən azı “Gold” statusunda saxlanılıb. Ən azı 1 dəfə uçuş edənlər isə öz statuslarında saxlanılıb.
5. Öncəki “Classic”, “Gold”, “Platinum” statuslu iştirakçılar həyata keçirdikləri uçuşlardan asılı olaraq “Elite” statusuna yüksələ bilərlər.
6. 18 yaşdan yuxarı hər kəs və ya valideyn köməyi ilə 2 yaşdan yuxarı uşaqlar şəxsi kabinetdə qeydiyyatdan keçməklə proqramın iştirakçısı ola bilər.
"Volkswagen" ilk dəfə Almaniyadakı fabrikini bağlamağı düşünür
"Volkswagen Group" tarixində ilk dəfə Almaniyada fabrikləri bağlaya və kütləvi ixtisarlar tətbiq edə biləcəyini açıqlayıb. Avtomobil istehsalçısı Almaniyada kütləvi ixtisarların həyata keçirilməsi kimi xərcləri azaltmaq üçün də addım ata bilər. Şirkətin məqsədi 2026-cı ilə qədər təxminən 10 milyard dollar qənaət etməkdir.
"Suicide Squad: Kill the Justice League" oyunu işçilərə baha başa gəldi
"Suicide Squad: Kill the Justice League" oyunu ilə bağlı böyük gözləntiləri olan "Rocksteady" gözlədiyini ala bilmədiyi üçün işçiləri ixtisar etməyə başlayıb. Daxil olan məlumata görə, şirkətin keyfiyyətə nəzarət departamentində işçilərin sayı 33-dən 15-ə endirilib. Bu vəziyyətin səbəbi kimi DC personajlarının oynadığı oyunun zəif satış rəqəmləri göstərilib.
"BMW" "E Ink" texnologiyası üçün tarix verdi
"BMW" avtomobillərinin görünüşünü fərdiləşdirən və rəngini asanlıqla dəyişə bilən "E Ink" texnologiyasının tarixini açıqlayıb. Şirkətin texniki mühəndislərindən biri olan Dr. Stella Clarke "E Ink" texnologiyasının 2027-ci ilə qədər kütləvi istehsala keçə biləcəyini qeyd edib.
"WhatsApp"a süni intellekt dəstəkli söhbət rejimi gəlir
"WABetaInfo"ya görə, platforma "Meta AI" vasitəsilə süni intellekt dəstəkli səsli söhbət rejiminə sahib olacaq. Hələ inkişaf mərhələsində olan xüsusiyyət "Play Store"da yayımlanan ən son “WhatsApp Android beta 2.24.18.18” yeniləməsi ilə ortaya çıxıb.
Daha çox
Daily
kateqoriyasından
