"Telegram" ABŞ hökuməti ilə minlərlə istifadəçi məlumatını paylaşıb | Bu günün xəbərləri

Yaradıcılıq, texnologiya və startap sahələri üzrə gündəmdə olan xəbərləri buradan izləyə bilərsiniz. Bu günün xəbərləri ilə qarşınızdayıq, xoş oxumalar!

Yuxuya tez getmək üçün süni intellektli ağıllı üzük təqdim edilib

Cənubi Kore mərkəzli "Viv Health" şirkəti “CES 2025”də yeni nəsil ağıllı üzüyü "Viv Ring"i təqdim edib. Bu cihaz yuxu keyfiyyətini artırmaq üçün fərdiləşdirilmiş "generativ yuxu dəstəkləyici səslər" texnologiyası ilə təchiz olunub. Şirkət yaxın gələcəkdə qan təzyiqi ölçən "Pro" modelini təqdim etməyi planlaşdırır. "Viv Ring"in əsas versiyasının gələn ay satışa çıxarılması gözlənilir.

"Grok" "Tesla" avtomobillərinə gəlir

"xAI" şirkəti tərəfindən hazırlanan "Grok" çatbotunun "Tesla" avtomobillərinə inteqrasiya ediləcəyi elan olunub. Musk "Grok"un avtomobillərin rəqəmsal panelinə əlavə ediləcəyini və sürücülərin avtomobilləri ilə danışaraq suallar verə biləcəyini bildirib. Bununla belə, bu yeniliyin nə vaxt təqdim ediləcəyi və pulsuz, yoxsa ödənişli olacağı ilə bağlı hələlik dəqiq məlumat yoxdur.

"Telegram" ABŞ hökuməti ilə minlərlə istifadəçi məlumatını paylaşıb

‍"Telegram"ın ABŞ hökumətindən aldığı məlumat tələblərində ciddi artım müşahidə edilib. Şirkətin Şəffaflıq Hesabatına görə, 2024-cü ildə 900 tələbi yerinə yetirərək 2,253 istifadəçinin məlumatlarını paylaşdığı açıqlanıb. Bu artım əsasən, "Telegram"ın CEO-su Pavel Durovun 2024-cü ilin avqustunda Fransada həbs edilməsindən sonra baş verib. Məlumata görə, oktyabr və dekabr aylarında istifadəçi məlumatlarını paylaşma halları kəskin şəkildə artıb.

"nubia Music 2" təqdim edildi

‍

‍"ZTE" şirkəti musiqisevərlərə xüsusi olaraq təqdim etdiyi nubia "Music" modelinin yeni versiyasını, "nubia Music 2"ni təqdim etdi. Yeni model 2.1 kanallı üç tam diapazonlu dinamiklər və DTS:X Ultra texnologiyası ilə təchiz edilib, maksimum 95 dB səs səviyyəsi təmin edir. Cihazda məkan səsi dəstəyi və musiqiyə uyğun LED işıqlandırma kimi xüsusiyyətlər mövcuddur.

Dünyanın ilk 750Hz oyun monitoru təqdim olundu

‍"CES 2025" çərçivəsində "Koorui" markası dünyanın ilk 750Hz yeniləmə sürətinə malik G7 oyun monitorunu təqdim etdi. 24,5 düymlük Full HD ekrana sahib bu monitor, HDR400 dəstəyi ilə oyunsevərlərə ən sürətli və rəngarəng təcrübəni vəd edir. Monitorun əvvəlcə Asiya bazarına, sonra isə digər bölgələrə çıxarılması planlaşdırılır.