Yaradıcılıq, texnologiya və startap sahələri üzrə gündəmdə olan xəbərləri buradan izləyə bilərsiniz. Bu günün xəbərləri ilə qarşınızdayıq, xoş oxumalar!
Teknofest komandası Beynəlxalq Astronavtika Konqresində iştirak edəcək
2-6 oktyabr tarixində Bakıda keçiriləcək IAC 2023-də Selçuk Bayraktar və Teknofest komandası iştirak edəcək. 2023 Beynəlxalq Astronavtika Konqresinin rəsmi Instagram səhifəsində paylaşılan videoda Selçuk Bayraktar bildirib ki, Teknofestdə layihə hazırlayan 500 yarışmacı ilə birlikdə orada olacaqlar. Konqresə eyni zamanda, bir çox astronavtların da iştirakı gözlənilir.
Coca-Cola süni intellektdən istifadə edərək yeni məhsulu "Y3000"i təqdim edib
Coca-Cola yeni qazlı içkisi “Y3000”i istehsal etmək üçün süni intellektdən dəstək alıb. Şirkət rəhbəri Oana Vlad bildirib: "Ümid edirik ki, Coca-Cola indiki kimi 3000-ci ildə də aktual və təravətləndirici olacaq. Ona görə də biz gələcəkdə bir kolanın dadının necə ola biləcəyini kəşf etmək üçün özümüzə meydan oxuduq". Məhsul ABŞ, Kanada, Çin, Avropa və Afrika da daxil olmaqla seçilmiş bazarlarda məhdud sayda satışa çıxarılıb.
“IDDA Awards” müsabiqəsinə qeydiyyat başladı
Qeydiyyatdan keçən namizədlər innovasiya sahəsində müxtəlif nominasiyalar üzrə 13 qalibdən biri olma şansını əldə edəcəklər. Mükafatlandırma mərasimi 1 dekabr 2023-ci ildə "Inmerge Innovation Summit" tədbirində baş tutacaq. Son qeydiyyat tarixi 6 oktyabrdır.
Starfield-ə mühüm yeniliklər gəlir!
Bethesda Games Starfield üçün mühüm yeniliklər elan etdi. Şirkət bu yaxınlarda uzun illərdir hazırlanmış və maraqla gözlənilən Starfield kosmik oyununu buraxdı. Starfield DLSS texnologiya dəstəyi olmadan buraxıldığı üçün mənfi tənqidlərə məruz qalmışdı. Bununla bağlı şirkət əhəmiyyətli bir açıqlama verdi. Bethesda Games tərəfindən edilən açıqlamaya görə, PC platforması üçün Starfield oyununa DLSS texnologiya dəstəyi əlavə olunacaq.
Adobe Firefly hər kəs üçün əlçatan olub
Keçən aylarda Photoshop-a "beta" olaraq daxil edilən Generative Fill kimi "Firefly" beta versiyasından çıxaraq geniş istifadəyə verilib. Bütün Creative Cloud üzvlərinə ayda 1000 kredit veriləcək. Bu kredit yalnız sürətli məzmun yaratmaq üçün təklif olunur. Ona görə də kredit bitdikdə sistem fəaliyyətini dayandırmır, sadəcə olaraq yavaşlayır. Müştərilər 4,99 dollardan başlayan əlavə Firefly Generative Credit abunə paketlərini ala bilərlər.
Telefonlarımıza gələcək yeni emojilər müəyyən oldu
Mesajlaşma proqramlarında, sosial mediada istifadə etdiyimiz emojilər üçün istinad nöqtəsi olan Unicode Konsorsiumu, rəsmi olaraq "Emoji 15.1" nəşr etdi. Belə ki, telefonlarımızda görə biləcəyimiz 118 yeni emoji təklifi paylaşıldı. Bu emojilərdən altısı tamamilə yeni simvollar olacaq.
Daha çox
Daily
kateqoriyasından
