Yaradıcılıq, texnologiya və startap sahələri üzrə gündəmdə olan xəbərləri buradan izləyə bilərsiniz. Bu günün xəbərləri ilə qarşınızdayıq, xoş oxumalar!
Böyük Britaniyada gənclərin sosial mediadan istifadəsinə məhdudiyyət qoyula bilər!
Böyük Britaniyada gənclərin sosial mediada zərərli məzmundan qoruması üçün Onlayn Təhlükəsizlik Aktı qüvvəyə minib. Bloomberg-in məlumatına görə, yeni ildə uşaqların sosial mediada məruz qaldığı riskləri araşdırmaq üçün konsultasiyaya başlanılacaq. Bəzi mənbələr 16 yaşdan kiçiklər üçün sosial media qadağalarının nəzərdən keçirildiyini deyib. Buna baxmayaraq, hökumət sözçüsü konkret bir şeyə qarşı təzyiq göstərməkdənsə, valideynlərin məlumatlılığını artırmaq yollarına baxdıqlarını bildirib.
"Spotify" süni intellekt inteqrasiyası etməyə hazırlaşır
Spotify istifadəçilərə mətn əmrlərindən pleylistlər yaratmağa imkan verən yeni süni intellekt əsaslı funksiyasını sınaqdan keçirdiyini bildirilib. AI pleylist xüsusiyyəti istifadəçilərə "Səssiz bir mühit üçün fon musiqisi", "Əyləncəli, ritmik və müsbət mahnılar" kimi təkliflər edəcək. İstifadəçilər təklifləri dəyərləndirə və Spotify-ın süni intellekti ilə seçilmiş mövzu əsasında pleylist yarada bilər.
Ölkəmizdə “CulTech Hakatonu” təşkil olundu
Azərbaycanda ilk dəfə kreativ sektorda olan problemlərə innovativ həll yolları tapmağa çalışan komandaları bir araya gətirən “CulTech Hakatonu” təşkil olunub. Hakaton zamanı 48 saat boyunca iştirakçılar mentor dəstəyi alıb və öz innovativ məhsullarının prototiplərini hazırlayıblar. Ən sonda keçirilən müsabiqədə isə münsiflər heyəti tərəfindən seçilmiş komandalar mükafatla təltif olunub.
“Netflix” 2024-cü ildə kitabxanasına əlavə edəcəyi oyunları açıqladı!
2024-cü ildə Netflix oyunlar kitabxanasına hansı oyunların əlavə olunacağı artıq bəlli olub. Belə ki, platformanın kitabxanasına əlavə olunacaq dörd oyun elan edilib: "Cozy Grove: Camp Spirit", "FashionVerse", "Game Dev Tycoon" və "Sonic Mania Plus". Qeyd olunan ikinci oyun ilk dəfə "Netflix Games" üçün eksklüziv olaraq təqdim olunacaq. Eyni zamanda, oyun mobil cihazlar üçün də əlçatan olacaq.
“Epic Games”dən yeni il hədiyyəsi! "Destiny 2 Legacy Collection" pulsuz təqdim olunub
Epic Games hər həftə pulsuz oyunlar təklif etmək ənənəsini davam etdirir. Bu həftənin pulsuz oyunu Epic Games Store-da mövcud olan "Destiny 2: Legacy Collection" olub. Qeyd edək ki, oyun 19 dekabr, 19:00-a qədər pulsuz olmağa davam edəcək.
"Threads" nəhayət Avropada da əlçatan olub
"Threads" çıxdığı ilk gündən etibarən milyonlarla istifadəçiyə çatmış olsa da, tətbiq Avropa ölkələri üçün aktiv deyildi. Bu mövzuda "Instagram"ın etdiyi açıqlama bu cür olmuşdu:
“Avropa "Meta" üçün çox vacib bazar olmağa davam edir və biz gələcəkdə "Threads"i daha çox ölkəyə gətirə biləcəyimizə ümid edirik”.
Bununla belə, "Threads" artıq Avropada təxminən yarım milyarddan çox istifadəçi üçün əlçatan olmağa başlayıb.
"Honor" və "Porsche Design" imzalı ağıllı cihaz gəlir
Bu gün rəsmi olaraq, "Honor" və "Porsche Design" əməkdaşlığı çərçivəsində smart cihazın gələcəyi elan edilib. İkilinin bu mövzuda verdiyi açıqlamada bildirilib:
“Honor və Porsche Design tərəfindən birgə hazırlanan ilk ağıllı cihaz 2024-cü ilin yanvarında Çində təqdim ediləcək".
Bu ağıllı cihazın nə olduğu hələ məlum deyil, lakin onun xüsusi hazırlanmış smartfon modeli olma ehtimalı yüksəkdir.
Günəş panellərindən hazırlanmış interaktiv "Lexus" heykəli təqdim edilib
Holoqramı xatırladan heykəl şirkətin 2026-cı ildə satışa çıxaracağı tam elektrik Lexus LF-ZC (Future Zero Emission Catalyst) sedan konsepti üçün hazırlanıb. Quraşdırmanın nümayişi dekabrın 17-dək davam edəcək. Qeyd edək ki, bu quraşdırma dizayner Marjan van Aubel-in Mayamidəki ilk ictimai layihəsidir.
Daha çox
Daily
kateqoriyasından
