Yaradıcılıq, texnologiya və startap sahələri üzrə gündəmdə olan xəbərləri buradan izləyə bilərsiniz. Bu günün xəbərləri ilə qarşınızdayıq, xoş oxumalar!
23 minə yaxın IMEI koda “klon” statusu verilib
“AzInTelecom” MMC ölkəyə gətirilən mobil cihazların qanunsuz yollarla qeydiyyatdan keçirilməsinə qarşı mübarizə tədbirlərini davam etdirir. Mütəmadi monitorinqlər nəticəsində surəti köçürülmüş IMEI kodlar aşkarlanaraq onlara “klon” statusu verilir.
Mübarizə tədbirləri çərçivəsində bu günədək 22 935 IMEI koda “klon” statusu verilərək bloklanıb. Həmin IMEI kodlar bloklanmamışdan əvvəlki 3 ayda 1 558 527 ədəd mobil nömrəyə aid abunəçi kimliyi ilə şəbəkədə görünüb. Bloklanmış IMEI kodlarla bu günədək 1 097 702 dəfə şəbəkəyə qoşulma cəhdinə “AzInTelecom”un Mobil Cihazların Qeydiyyat Sistemi (MCQS) imtina cavabı verib.
Nazirlər Kabinetinin qərarı ilə təsdiq edilmiş “Mobil cihazların qeydiyyatının aparılması Qaydası”na əsasən, xaricdən gətirilən mobil cihazlar yerli telekommunikasiya şəbəkəsində istifadə olunması üçün 30 gün ərzində dövlət rüsumu ödənilməklə qeydiyyatdan keçirilməlidir. Təəssüf ki, bəzi hallarda qeydiyyat rüsumunu ödəmək istəməyən şəxslər (və ya sahibkarlar) daha əvvəl qeydiyyatdan keçirilmiş cihazların IMEI kodlarının surətini yenilərinə köçürərək onların satışını həyata keçirirlər. Alıcı isə bu prosesdən məlumatsız olduğu üçün sonradan cihaza tətbiq olunan məhdudiyyətlə üzləşir.
Bu cür hallarla qarşılaşmamaq üçün mobil cihaz alarkən mütləq IMEI kodunun orjinallığını yoxlamaq tövsiyə olunur. Yoxlamanı “portal.rinn.az” saytında pulsuz həyata keçirmək mümkündür. Bunun üçün cihazın ekranında *#06# yığaraq çıxan kodu kopyalayıb saytda “IMEI yoxlama” hissəsinə yapışdırmaq və “yoxla” düyməsini sıxmaq kifayətdir.
"Microsoft" "Paint 3D" ilə vidalaşır
“Windows 10” ilə həyatımıza daxil olan və 3D modelləşdirmə imkanı təqdim edən "Paint 3D" 4 noyabr 2024-cü il tarixində "Microsoft Store"dan tamamilə silinəcək.
Paint 3D silindikdən sonra istifadəçilər 2D şəkillər üçün Paint və ya Fotolardan, 3D məzmun üçün isə 3D Viewer-dən istifadə edə biləcəklər. Bu qərarla "Microsoft" yenidən klassik Paint tətbiqini inkişaf etdirməyə diqqət yetirir. Şirkət "Photoshop"un bəzi məşhur xüsusiyyətlərini "Paint"ə inteqrasiya edib. Bununla belə, "OpenAI" ilə əməkdaşlıq sayəsində "DALL-E"nin süni intellekt imkanlarını "Paint"ə əlavə edərək tətbiqi daha funksional hala gətirməyi hədəfləyir.
"YouTube Music" istifadəçi təcrübəsini təkmilləşdirmək üçün yeniləmə edib
"YouTube Music" istifadəçi təcrübəsini daha axıcı və zövqlü etmək üçün mühüm dizayn yeniləməsi edib. Tətbiqin Android və iOS platformalarındakı ana səhifəsi artıq daha sadə və istifadəçi dostu dizayna sahib olacaq.
Bu yeniləmələrlə "YouTube Music"in ümumi istifadəçi məmnuniyyətinin artacağı gözlənilir.
"CrowdStrike" prezidenti "Most Epic Fail" mükafatını alıb
"CrowdStrike" tərəfindən maraqlı və gülməli bir inkişaf gündəmə gəlib. Belə ki, 8,5 milyon “Windows” cihazına təsir edən "CrowdStrike" platformasının prezidenti "Def Con"da "Most Epic Fail" mükafatına layiq görülüb.
"Google"dan "Chrome" istifadəçilərinə şok xəbər! "uBlock Origin" dövrü bitir?
"Google" şirkəti "Chrome" istifadəçilərini təəccübləndirən bir qərarla məşhur reklam bloklayıcısı "uBlock Origin"i deaktiv etməyə hazırlaşır. Yeni qaydalar 30 milyondan çox istifadəçisi olan "uBlock Origin"in "Chrome"da işləməsini çətinləşdirəcək.
Daha çox
Daily
kateqoriyasından
