Yaradıcılıq, texnologiya və startap sahələri üzrə gündəmdə olan xəbərləri buradan izləyə bilərsiniz. Bu günün xəbərləri ilə qarşınızdayıq, xoş oxumalar!
"Xiaomi" qutularının məzmunu dəyişəcək
Hazırda məşhur markalar, xüsusilə "Apple" və "Samsung" qutunun içindəkilərə o qədər də əhəmiyyət vermir. "Realme", "Oppo", "Infinix", "Vivo" kimi markaların qutu məzmunu nisbətən daha çoxdur. “Xiaomi” də bu markalar arasında idi, amma deyəsən, işlər dəyişib. Belə ki, brend Avropaya göndərdiyi “Redmi13” model cihazlarının qutusundan şarj adapterini çıxarıb.
"Amazon" "Metis" adlı AI modeli üzərində işləyir
"Amazon" şirkəti "OpenAI"ın məşhur "ChatGPT" çatbotuna rəqib olacaq "Metis" adlı süni intellekt modeli hazırlayır. "Metis" yunan mifologiyasında müdriklik ilahəsi kimi tanınır. "Amazon"un bu layihəyə belə bir ad verməsi onun nə qədər iddialı olduğunu göstərir. Bu, təkcə texnologiyanın inkişafı prosesi deyil, həm də "Amazon"un süni intellekt sahəsində rəqabət qabiliyyətini artırmaq strategiyasının bir hissəsi olacaq.
iOS 18 beta 2 çıxdı!
WWDC 2024-də elan edilən "iPhone Mirroring" funksiyası sayəsində iPhone-ları birbaşa Mac-dan idarə etmək mümkün olacaq. Bu funksiya ilk beta versiyada mövcud deyildi, lakin macOS Sequoia Beta 2 ilə aktivləşdirilib. İndi siz Mac-da hər şeyi edə bilərsiniz. iPhone kilidli olarkən proqramları açıb istifadə etməkdən tutmuş bildirişləri idarə etməyə qədər.
"Google"dan yenilik: Öz surətinizlə söhbət edə biləcəksiniz
Yeni süni intellekt layihəsi sayəsində "Google" sizə öz surətiniz, hər hansı bir YouTuber və ya seçdiyiniz qondarma personajla danışmaq imkanı verəcək. "Google" bu layihəni müstəqil bir məhsul kimi təqdim etməkdənsə, "YouTube"a inteqrasiya etməyi planlaşdırır.
Beləliklə, YouTube məzmun yaradıcıları öz süni intellekt nüsxələrini istehsal edə və izləyiciləri ilə daha çox ünsiyyət qura biləcəklər. Layihənin buraxılış tarixi hələ müəyyən edilməsə də, bu çatbot platformasının ilk olaraq Google Labs səhifəsində sınaqdan keçirilməsi gözlənilir.
Türkiyənin ilk astronavtı Alper Gezeravcı Bakıya gəlir!
27-28 İyun tarixlərində baş tutacaq Baku ID tədbirində bizləri bir sıra prestijli şirkət və qurumların əməkdaşları gözləyir. Qeyd edək ki, bu möhtəşəm tədbirin "Space" panel spikerlərindən biri Türkiyənin ilk astronavtı Alper Gezeravcı olacaq. Gezeravcı panel müzakirəsi zamanı kosmosda innovasiyalarla bağlı öz fikir və təcrübələrini bizimlə bölüşəcək.
Daha çox
Daily
kateqoriyasından
