"Apple" və 15-dən çox aviaşirkət arasında yeni əməkdaşlıq | Bu günün xəbərləri

Yaradıcılıq, texnologiya və startap sahələri üzrə gündəmdə olan xəbərləri buradan izləyə bilərsiniz. Bu günün xəbərləri ilə qarşınızdayıq, xoş oxumalar!

Asiyanın ən zəngin adamı robot sektoruna daxil olur

98 milyard dollar sərvəti olan Asiyanın ən zəngin insanı Mukesh Ambani, insanabənzər robot sektoruna investisiya etməyə qərar verib. "Reliance Industries" şirkətinin sahibi olan Ambani, bu məqsədlə "Addverb Technologies" adlı şirkətlə əməkdaşlıq edib. Şirkətin ilk insanabənzər robotlarının 2025-ci ildə təqdim olunacağı və müxtəlif sahələrdə, o cümlədən moda və enerji sektorunda çalışa biləcəyi bildirilir. İlkin mərhələdə 100 ədəd robotun istehsalı planlaşdırılır, sonrakı illərdə isə bu rəqəm artırılacaq.

"OpenAI" "Dotdash Meredith"ə 16 milyon dollar ödəyəcək

‍"OpenAI" şirkəti "People", "Better Homes & Gardens" və "InStyle" kimi jurnalların nəşriyyatı olan "Dotdash Meredith" ilə kontent lisenziyalaşdırma müqaviləsi bağlayıb. Müqavilənin minimum illik dəyərinin 16 milyon dollar olduğu bildirilib. Müqavilə çərçivəsində, "OpenAI" bu nəşriyyatın kontentini süni intellekt modellərini təlim etmək üçün istifadə edəcək.

"Apple" və 15-dən çox aviaşirkət arasında yeni əməkdaşlıq

‍"Apple" baqaj izləmə prosesini təkmilləşdirmək üçün "British Airways", "Delta Air Lines", "Qantas, United" və "Virgin Atlantic" daxil olmaqla, 15-dən çox aviaşirkətlə əməkdaşlıq elan edib. Bu yenilik sayəsində sərnişinlər "AirTag" cihazlarının yerini "Find My" tətbiqi vasitəsilə birbaşa aviaşirkətlərlə paylaşa biləcəklər. Xidmət gecikmiş və ya səhv idarə olunan baqajlarla bağlı real vaxt məlumatlarını aviaşirkətlərin müştəri xidməti komandalarına təqdim edir.

"Samsung" telefon kamerasını kiçiltməyi planlaşdırır

‍"Samsung" ağıllı telefonlardakı kameraları daha kiçik edəcək yeni texnologiya üzərində işləyir. “All Lenses on Prism” (ALoP) adlanan bu texnologiya, böyük kamera çıxıntıları olmadan keyfiyyətli portret fotolar çəkməyə imkan yaradacaq. Şirkət bu yenilik sayəsində daha zərif dizayna malik telefonlar hazırlamağı hədəfləyir.

"Minecraft" filminin yeni fraqmanı yayımlandı

2025-ci ilin 4 aprelində nümayiş etdiriləcək "Minecraft" filmindən yeni uzun fraqman təqdim olunub. Filmdə sirli bir portal vasitəsilə dörd fərqli obrazın "Overworld" adlı möcüzə diyarına düşməsi təsvir edilir.