Yaradıcılıq, texnologiya və startap sahələri üzrə gündəmdə olan xəbərləri buradan izləyə bilərsiniz. Bu günün xəbərləri ilə qarşınızdayıq, xoş oxumalar!
Bakıda əhalinin tibbi müayinəsi ilə bağlı yeni qeydiyyat sistemi yaradılıb
Report-un verdiyi məlumata görə, TƏBİB pilot layihə kimi Bakı şəhəri üzrə ilkin səhiyyə xidmətinin təkmilləşdirilməsi məqsədilə əhalinin tibb müəssisələrinə təhkim olunmasına başlayıb. Bunun üçün “E-tabib” mobil tətbiqində yeni qeydiyyat sistemi yaradılıb. Bu proses həmçinin gələcəkdə həkimlərin qiymətləndirilməsini, onların iş yükünün müəyyən olunmasını və xəstə sayı haqqında məlumatları da əlçatan edəcək.
Blue Origin yeni kosmik gəmisini elan etdi!
Jeff Bezos 2000-ci ildə aviasiya və kosmik tədqiqatlar üçün Blue Origin şirkətini qurdu. Şirkət kosmosa uçuşu daha ucuz və təhlükəsiz etməyi planlaşdırır. Bundan əlavə, Jeff Bezos kosmosda yeni layihələr hazırlamağı hədəfləyir. Bu məqsədə çatmaq üçün o, Blue Ring adlı kosmik gəmi hazırlayıb. Bundan əlavə, şirkət Blue Ring layihəsi ilə yanaşı, fərqli kosmik layihələr üzərində də işlər görməyə davam edir.
WhatsApp-da səsli mesajlar üçün yeni funksiya gəlir
WABetaInfo-nun verdiyi məlumata görə, WhatsApp beta istifadəçiləri üçün öz-özünə silinən səsli mesaj funksiyasını sınaqdan keçirməyə başlayıb. Sözügedən xüsusiyyət "bir dəfə bax" seçimi olan foto və videolarla eyni sistemə malikdir. Yeni funksiya hazırda beta istifadəçiləri üçün sınaqdan keçirilir. Xüsusiyyətin bütün istifadəçilər üçün nə vaxt əlçatan olacağı bilinmir.
WhatsApp-dan sonra "Kanallar" funksiyası Facebook-a gəlir
Yaxın vaxtlarda Instagram-a kanallar funksiyası əlavə edilmişdi. Bununla da, müxtəlif səhifə sahiblərinin izləyiciləri ilə qarşılıqlı əlaqə qura biləcəyi yeni hissə yaradıldı. Bu xüsusiyyət sayəsində Instagram istifadəçilərinin və məzmun yaradıcılarının kütləyə birbaşa çatması asanlaşdı. Meta indi həmin kanallar funksiyasının tezliklə Facebook və Messenger istifadəçiləri üçün əlçatan olacağını açıqlayıb.
BMW-nin elektrikli avtomobilləri Teslanın şarj stansiyalarından istifadə edə biləcək
Bu yaxınlarda bəzi avtomobil markaları Tesla-nın şarj stansiyalarına daxil edilib. Ford və Mercedes-Benz-dən sonra BWM-nin elektrik avtomobilləri artıq Tesla-nın şarj stansiyalarından faydalana biləcək. 2025-ci ildən etibarən BMW-nin yeni nəsil elektrik avtomobilləri Teslanın Şimali Amerika Doldurma Standartı (NACS) ilə təchiz ediləcək.
WhatsApp tezliklə bir cihaza 2 hesab əlavə etməyə imkan verəcək
Artıq WhatsApp üçün ikinci telefon daşımağa ehtiyac qalmayacaq. Digər hesaba daxil olmaq üçün hətta hesabınızdan çıxmağınız belə lazım deyil. İki hesaba eyni vaxtda giriş əldə etmək üçün proqramın “Parametrlər” səhifəsinə keçib "Hesab əlavə et" düyməsinə klikləmək kifayət olacaq. Yeni funksiyanın yaxın həftələrdə Android cihazları üçün əlçatan olacağı gözlənilir.
Daha çox
Daily
kateqoriyasından
