Yaradıcılıq, texnologiya və startap sahələri üzrə gündəmdə olan xəbərləri buradan izləyə bilərsiniz. Bu günün xəbərləri ilə qarşınızdayıq, xoş oxumalar!
Trump "Apple" üçün iki böyük təhlükə yaradır!
Donald Trump-ın yenidən prezident seçilməsi ilə "Apple" yeni iqtisadi və siyasi çağırışlarla üzləşib. ABŞ-nin Çindən edilən idxala 10 %-lik gömrük rüsumu tətbiq etməsi, "Apple"ın istehsal xərclərini artıraraq satışlarına mənfi təsir göstərə bilər. "Apple" daha əvvəlki Trump dövründə gömrük rüsumlarından azad edilsə də, Çin-ABŞ arasında artan gərginlik bu dəfə vəziyyəti daha da çətinləşdirə bilər.
Hollandiya "DeepSeek"i qadağan edib!
Hollandiya hökuməti təhlükəsizlik narahatlıqları səbəbindən "DeepSeek"in dövlətə məxsus cihazlarda istifadəsini qadağan edib. Dövlət naziri Zsolt Szabo tətbiqin "casusluğa meyilli" olduğunu bildirib və bu qərarın yalnız mərkəzi hökumət cihazlarını əhatə etdiyini qeyd edib. "DeepSeek", Çindəki High-Flyer Capital Management tərəfindən dəstəklənən və qısa müddətdə məşhurlaşan süni intellekt proqramıdır. Daha öncə ABŞ, İtaliya, Avstraliya və Cənubi Koreya kimi ölkələr də oxşar qadağa qərarları almışdılar.
"Apple" ilk qatlana bilən telefonu nə vaxt gəlir?
"Apple"ın illərdir üzərində işlədiyi ilk qatlanan "iPhone" haqqında yeni məlumatlar ortaya çıxıb. Sözügedən cihazın 2026-cı ilin payızında təqdim ediləcəyi gözlənilir. Yeni model "Samsung Galaxy Z Fold" seriyasına rəqib olacaq və açıq halda cəmi 4,6 mm, qatlanmış halda isə 9,2 mm qalınlıqda olacaq. Telefon 7,6-7,9 düymlük qatlanan OLED ekran, ultra nazik şüşə texnologiyası və titanyum materialı ilə istehsal ediləcək.
"SEGA" "Football Manager 2025"i ləğv edib
"SEGA" bu ilin gözlənilən "Football Manager 2025" oyununun buraxılmayacağını açıqlayıb. Şirkətin rüblük hesabatında bildirilib ki, ümumi oyun təcrübəsi və interfeys tələb olunan səviyyədə deyil. Bununla belə, "SEGA" və "Sports Interactive" komandası diqqətlərini "Football Manager 2026"ya yönəldiblər.
"OpenAI" yeniləndi: yeni loqo, şrift və dizayn
"OpenAI" yeni loqo, şrift və dizaynı əhatə edən rebrendinq prosesini tamamlayıb. Yeni loqo əvvəlkindən daha aydın xətlərə və mərkəzində bir qədər geniş boşluğa malikdir. Şirkət dizayn prosesində "ChatGPT" və "DALL·E" kimi AI vasitələrindən də istifadə edib.
Daha çox
Daily
kateqoriyasından
