Yaponiyada ilk dəfə "Nintendo Switch"də dəyişiklik edən şəxs həbs edilib | Bu günün xəbərləri

Yaradıcılıq, texnologiya və startap sahələri üzrə gündəmdə olan xəbərləri buradan izləyə bilərsiniz. Bu günün xəbərləri ilə qarşınızdayıq, xoş oxumalar!

"Sony" yeni "God of War" oyununu ləğv etdi

‍"Sony" "Bluepoint Games" tərəfindən hazırlanmaqda olan və canlı xidmət formatında planlaşdırılan yeni "God of War" oyununu rəsmi olaraq dayandırıb. "Bloomberg"in məlumatına görə, bu qərar "Sony"nin son illərdə uğursuz nəticələr əldə etdiyi "live-service" oyun strategiyasını yenidən nəzərdən keçirməsi ilə əlaqədardır. Şirkət əvvəllər "Bend Studios" tərəfindən hazırlanan bir layihəni də eyni səbəblə ləğv etmişdi.

"Fortnite"da yeni döyüş: "Godzilla" gəlir!

"Fortnite" oyununda əfsanəvi "Godzilla" ilə qarşılaşmağa hazır olun. 17 yanvar tarixindən başlayaraq məhdud zaman ərzində oyunçular "Godzilla" rolunda oynaya və digər iştirakçılara qarşı döyüşə biləcəklər. Bununla yanaşı, "Godzilla" temalı kostyumlar və xüsusi aksesuarlar da oyunçulara təqdim ediləcək.

Bir dövrün sonu: "RTX 4060" və "4070" istehsalı dayandırılır?

"Nvidia" "RTX 50" seriyası ekran kartlarına fokuslanaraq "RTX 4060" və "RTX 4070" modellərinin istehsalını dayandıra bilər. Şirkət yeni nəsil "RTX 5090" və "RTX 5080" modellərini yanvarın 30-da, "RTX 5070" və "RTX 5070 Ti" modellərini isə fevralda təqdim etməyi planlaşdırır.

Yaponiyada ilk dəfə "Nintendo Switch"də dəyişiklik edən şəxs həbs edilib

Yaponiyada 58 yaşlı kişi "Nintendo Switch" konsollarını dəyişdirərək qanunsuz oyunları işlədə bilən vəziyyətə gətirdiyi üçün həbs edilib. Bildirilir ki, o, dəyişdirdiyi cihazları 27 qanunsuz oyunla birlikdə təxminən 28.000 yen (təxminən 180 dollar) qarşılığında satıb. Polisin məlumatına görə, şübhəli şəxs günahını etiraf edib və digər qanunsuz fəaliyyətlərlə bağlı araşdırmalar davam edir.

"ASUS" yeni "ExpertBook B3" seriyasını təqdim edib

Yüngül (1.4 kq) və möhkəm dizayna malik bu seriya, iş dünyasının ehtiyaclarını ödəmək üçün “Intel Core Ultra 7” prosessoru, “Intel vPro” texnologiyası və “Intel Arc” qrafikləri ilə təchiz olunub. AI ilə təkmilləşdirilmiş "ASUS AI ExpertMeet", "Microsoft Copilot" və səs-küy azaldıcı texnologiyalar cihazın məhsuldarlığını artırır.