"WhatsApp" rəngli dizayn stilinə keçid edir! | Bu günün xəbərləri

Yaradıcılıq, texnologiya və startap sahələri üzrə gündəmdə olan xəbərləri buradan izləyə bilərsiniz. Bu günün xəbərləri ilə qarşınızdayıq, xoş oxumalar!

"Apple AirTag 2": Tanıtım tarixi və gözlənilən yeniliklər

‍"Apple" 2025-ci ilin ortalarında təqdim etməyi planlaşdırdığı “AirTag 2” modeli üzərində işləyir. Yeni cihaz təkmilləşdirilmiş simsiz bağlantı və daha yüksək məxfilik səviyyəsi ilə fərqlənəcək. Dizayn baxımından isə "AirTag 2" əvvəlki modelin ümumi görünüşünü qoruyacaq. İstehsal prosesi zamanı “B589” kod adı ilə tanınan cihazın inkişafı ilə bağlı sızmalar artmağa davam edir. Yeni nəsil "AirTag" ilə bağlı daha ətraflı məlumatların yaxın aylarda ortaya çıxması gözlənilir.

"Netflix"dən Milad bayramına özəl xüsusi şou!

"Netflix" birbaşa yayımladığı Tyson-Paul döyüşündə baş verən texniki nasazlıqlara baxmayaraq, böyük tədbirlər keçirməyə davam edir. Platforma bu dəfə Milad bayramında iki eksklüziv NFL yayımına yer verəcəyini açıqlayıb.

"PS5 Pro" istifadəçiləri məyus edib

"Sony"nin "PlayStation 5 Pro" konsoluna əlavə etdiyi "PlayStation Spectral Super Resolution" (PSSR) texnologiyası, bəzi istifadəçilərdə görüntü problemlərinə səbəb olub. PSSR oyun qrafikasını təkmilləşdirmək üçün nəzərdə tutulsa da, 60 FPS rejimində ağ nöqtələr, kənarların təhrif olunması və titrəmə kimi problemlər müşahidə edilib.

"Xiaomi" yeni "powerbank" modelini təqdim edib

‍"Xiaomi" 5000mAh tutumuna malik olan "Ultra Slim Powerbank" modelini təqdim edib. Cəmi 113 x 53 x 10 mm ölçüləri və 93 qram ağırlığı ilə bu cihaz, həm kompakt, həm də gündəlik istifadəyə uyğundur. 20W-a qədər sürətli enerji doldurma funksiyası təqdim edən "powerbank", həm smartfonları, həm də planşetləri effektiv şəkildə enerji ilə təmin edə bilir.

"WhatsApp" rəngli dizayn stilinə keçid edir!

‍"WhatsApp" istifadəçi təcrübəsini yaxşılaşdırmaq üçün yeni rəngli dizayn üzərində işləyir. Belə ki, profil şəkli olmayan şəxslər və qruplar üçün avtomatik rəngli simvollar tətbiq ediləcək. Yeni funksiya yalnız istifadəçinin cihazında görünəcək və digər şəxslərin tətbiqinə təsir etməyəcək.