Yaradıcılıq, texnologiya və startap sahələri üzrə gündəmdə olan xəbərləri buradan izləyə bilərsiniz. Bu günün xəbərləri ilə qarşınızdayıq, xoş oxumalar!
"Redmi K80" təqdim edildi
"Xiaomi" gözlənilən "Redmi K80" seriyasını rəsmi olaraq istifadəçilərə təqdim edib. "Redmi K80" modeli 6.67 düymlük 2K OLED ekran, 120 Hz yeniləmə və 480 Hz toxunma tezliyi ilə yüksək görüntü təcrübəsi təklif edir. Snapdragon 8 Gen 3 prosessoru ilə təchiz olunan cihaz, 12/16 GB RAM və 256 GB-dan 1 TB-a qədər yaddaş seçimləri ilə təqdim edilir. HDR10+, Dolby Vision və HDR Vivid dəstəyi sayəsində ekran keyfiyyəti daha da təkmilləşdirilib. "Redmi K80"in qiyməti və satış tarixi hələ ki rəsmi olaraq açıqlanmayıb.
"Samsung"dan genişlənə bilən ekranlı unikal planşet!
"Samsung" genişlənə bilən ekrana sahib unikal planşet patentini qeydiyyatdan keçirib. Yeni patent cihazın istifadəçinin ehtiyacına uyğun avtomatik olaraq ekranını genişlədə bilmə xüsusiyyəti ilə diqqət çəkir. Planşet həm genişlənmiş formada, həm də ilkin ölçüsünə qayıda bilir. Şirkət bu addımı ilə qatlanabilən ekran texnologiyasındakı liderliyini genişlətməyi və rəqabəti artırmağı hədəfləyir. Lakin bu texnologiyaya sahib planşetin bazara nə vaxt çıxacağı hələ ki məlum deyil.
"Qualcomm" "Intel"i almaqdan imtina edib
"Qualcomm" "Intel"in müəyyən hissəsini almaq planından geri çəkilib. Şirkətin bu qərarı, həm maliyyə çətinlikləri, həm də ABŞ və digər ölkələrdəki tənzimləyici orqanların qərarı ilə bağlı olub. Məlumata görə, "Intel"in 50 milyard dollara yaxın borcu "Qualcomm" üçün böyük bir maneə yaradıb. Analitiklər belə bir satınalmanın həm "Qualcomm", həm də "Intel" üçün ciddi maliyyə riskləri yaradacağını bildirirlər.
"Xiaomi" "Redmi Watch 5"i təqdim etdi
"Xiaomi" geyilə bilən texnologiyalar bazarında yeni "Redmi Watch 5" ağıllı saatını təqdim edib. 24 gün batareya ömrünə malik olan cihaz, AMOLED ekranı və alüminium çərçivəsi ilə diqqət çəkir. Saat SpO₂ təqibi, 24 saat ürək döyüntüsü monitorinqi, NFC və ağıllı avtomobil açarı funksiyaları təklif edir.
"Baldur's Gate 3"dən böyük yenilik!
"Baldur's Gate 3" oyununa 2025-ci ildə yayımlanacaq “Patch 8” yenilənməsi çərçivəsində 12 yeni "subclass", "cross-play" və foto rejimi əlavə ediləcək. Hər sinif üçün bir yeni "subclass" əlavə olunacaq və bu, xüsusi bacarıqlar, animasiyalar və VFX-lərlə müşayiət olunacaq. Foto rejimi oyunçulara 40-dan çox poza və obyektiv ilə yaradıcı şəkillər çəkməyə imkan verəcək.
Daha çox
Daily
kateqoriyasından
