Yaradıcılıq, texnologiya və startap sahələri üzrə gündəmdə olan xəbərləri buradan izləyə bilərsiniz. Bu günün xəbərləri ilə qarşınızdayıq, xoş oxumalar!
"OnePlus 13R" modeli ilə bağlı yeni məlumatlar ortaya çıxıb
"OnePlus" şirkəti yanvarın 7-də təqdim edilməsi gözlənilən "OnePlus 13R" modelinin üzərində işlərini davam etdirir. Etibarlı mənbələr tərəfindən paylaşılan render şəkilləri sayəsində telefonun dizaynı bəlli olub. Astral Trial və Nebula Noir rəng seçimləri ilə təqdim ediləcək cihaz, dairəvi üçlü kamera sistemi və yüksək ekran-gövdə nisbəti ilə seçiləcək.
Modelin, Çində tanıdılan "Ace 5"in qlobal bazar üçün rebrendinq edilmiş versiyası olacağı ehtimal edilir. Beləliklə, iki cihazın dizayn və adları fərqli olsa da, texniki xüsusiyyətlərinin eyni olması gözlənilir.
"Blue Origin" raketi uçuş hazırlıqlarını tamamlayıb
Jeff Bezos-un "Blue Origin" şirkəti "New Glenn" raketinin uçuşu üçün hazırlıqları tamamlayıb. Şirkət raket üçün Federal Aviasiya Administrasiyasından (FAA) kommersiya lisenziyası əldə edib. “7 BE-4” mühərriki ilə təchiz olunmuş və iki hissədən ibarət olan bu model, yük daşıma və yenidən istifadə qabiliyyəti ilə fərqlənir. "Blue Origin" CEO-su Dave Limp həyəcanla gözlənilən "NG-1" missiyası üçün konkret bir buraxılış tarixi açıqlamayıb.
Elon Musk-ın yeni adı: “Kekius Maximus”
Elon Musk "X" platformasındakı adını "Kekius Maximus" olaraq dəyişdirib və profil şəklini məşhur "Pepe the Frog" ilə yeniləyib. Bu dəyişiklikdən sonra “Kekius Maximus” adlı kriptovalyutanın dəyəri 497,56 % artıb. Milyarderin bu addımı sosial şəbəkələrdə böyük marağa səbəb olub, lakin onun kriptovalyuta ilə birbaşa əlaqəsi təsdiqlənməyib
"Samsung" insanabənzər robot istehsalına başlayır
"Samsung" Cənubi Koreyanın robot istehsalçısı "Rainbow Robotics" şirkətini öz törəmə şirkətinə çevirib və bu şirkətdəki investisiyalarını ikiqat artırıb. Şirkət "Rainbow Robotics"dəki payını 35 %-ə çatdıraraq insanabənzər robot texnologiyalarını inkişaf etdirməyi hədəfləyir. Şirkət HUBO adlanan insanabənzər robot seriyası ilə yanaşı, avtomatlaşdırılmış istehsal və logistika prosesləri üçün də robot texnologiyalarından yararlanacaq.
"Apple" "SE" adını dəyişə bilər
"Apple" ucuz "iPhone" modelinin adını dəyişdirərək “iPhone 16E” etməyi planlaşdırır. Yeni cihaz "iPhone 14"ə bənzər dizayna malik olacaq və OLED ekran, eləcə də proqramlaşdırıla bilən "Action Button" ilə təchiz ediləcək. Şirkət bu ad dəyişikliyi ilə uyğun qiymətli modelləri əsas məhsul qrupuna daha inteqrasiya olunmuş şəkildə təqdim etməyi hədəfləyir.
Daha çox
Daily
kateqoriyasından
