Yaradıcılıq, texnologiya və startap sahələri üzrə gündəmdə olan xəbərləri buradan izləyə bilərsiniz. Bu günün xəbərləri ilə qarşınızdayıq, xoş oxumalar!
COP29-un rəqəmsal məlumat platformasının yenilənmiş versiyası istifadəyə verilib
11-22 noyabrda Bakıda keçiriləcək COP29 konfransının rəsmi rəqəmsal məlumat platformasının yenilənmiş versiyası istifadəyə verilib.
COP29 Azərbaycan Əməliyyat Şirkətindən "Report"a bildirilib ki, təkmilləşdirilmiş versiyada olan veb-sayt COP29 konfransı ilə bağlı maraqlı tərəflərin əhatəli məlumatla təmin olunmasına xidmət edir. Veb-sayt görmə məhdudiyyətli şəxslər üçün xüsusi uyğunlaşdırılmış interfeysi təmin edərək, hər kəsin rahat və sərbəst istifadəsinə imkan yaradır. Yenilənmiş resurs qlobal iqlim konfransının mediada geniş işıqlandırılması üçün mətbuat nümayəndələrinə ən son məlumatlara çıxış imkanı verir. Rəqəmsal məlumat platformasında COP29-la əlaqədar informasiyaların operativ şəkildə yenilənməsi medianın dəqiq və vaxtında məlumat almasına imkan verir.
"X" platformasında gözlənilən dəyişiklik baş tutdu
"X" platformasında istifadəçilər üçün hesab bloklama xüsusiyyətində dəyişiklik edib. Yeni qaydalara əsasən, artıq bloklanmış profillər açıq hesabların paylaşımını görə biləcək, amma hər hansı bir şəkildə ünsiyyət qurmaq imkanı olmayacaq.
"Apple" "MacBook Pro" üçün köklü yenilikləri təxirə salıb
"Apple" şirkəti "MacBook Pro” modelləri üçün planlaşdırılan böyük dizayn dəyişikliyini 2026-cı ilə qədər təxirə salıb. Şirkətin 2025-ci ildə buraxacağı "MacBook Pro" modellərində yalnız yeni M5 prosessoru istifadə olunacaq, lakin mühüm dizayn dəyişikliyi gözlənilmir. "Bloomberg"dən Mark Qurmanın verdiyi məlumata görə, bu təxirə salınma ekran texnologiyasındakı texniki problemlərlə əlaqədardır. 2026-cı ildə isə OLED ekrana keçid və daha incə korpus dizaynı ilə "MacBook Pro" modelləri yenilənə bilər.
"Apple" ucuz "Vision" başlığı üzərində işləyir
"Apple" yüksək qiymətinə görə kifayət qədər maraq doğurmayan "Vision Pro"ya alternativ olaraq, daha sərfəli və iPhone-ların gücündən istifadə edən yeni bir "Vision" modelini inkişaf etdirməyi planlaşdırır. "Bloomberg" müxbiri Mark Qurmanın sözlərinə görə, yeni "Vision" başlığında bəzi funksiyalar iPhone-lar vasitəsilə idarə olunacaq. Texnologiya analitiki Ming Chi-Kuo, belə bir cihazın 2027-ci ildən əvvəl çıxmayacağını qeyd etsə də, yeni modelin yaxın zamanda təqdim edilməsi gözlənilir.
"Nvidia" ARM əsaslı kompüter prosessorunu təqdim etməyə hazırlaşır
"Nvidia" ARM əsaslı kompüter prosessorunu istehsal edərək, "Intel" ilə rəqabətə hazırlaşır. Şirkətin bu yeni prosessorunu 2025-ci ilin sentyabrında təqdim etməsi gözlənilir. Sızdırılan məlumatlara görə, "Nvidia" istehsal üçün "TSMC" şirkəti ilə əməkdaşlıq edəcək.
Daha çox
Daily
kateqoriyasından
