“ChatGPT”yə axtarış düyməsi gəlib | Bu günün xəbərləri

Yaradıcılıq, texnologiya və startap sahələri üzrə gündəmdə olan xəbərləri buradan izləyə bilərsiniz. Bu günün xəbərləri ilə qarşınızdayıq, xoş oxumalar!

“PS5 Pro” və oyunlarının qutusu ortaya çıxıb

Sosial mediada paylaşılan görüntülərdə “PS5 Pro”nun qutu qablaşdırmasının orijinal “PS5” modelinin qutusu ilə müqayisədə çox daha yığcam olması diqqət çəkir. Oyunçular üçün vacib detal olaraq, konsola uyğun oyun qutularında "PS5 Pro Enhanced" etiketi olacaq. Bu etiket, oyunun “PS5 Pro”nun qabaqcıl aparat xüsusiyyətlərindən istifadə edəcəyini göstərəcək və istifadəçilərə hansı oyunların konsolun bütün potensialından istifadə edə biləcəyini asanlıqla başa düşməyə imkan verəcək.

“ChatGPT”yə axtarış düyməsi gəlib

“ChatGPT” üçün yeni axtarış funksiyası təqdim edilib. Müvafiq olaraq, istifadəçilər keçmiş söhbətlərini açar sözlərlə skan edə biləcəklər. Şirkət bildirib ki, bu alət istifadəçilərə əvvəlki söhbətlərdən faydalı məlumatları daha asan əldə etməyə şərait yaradacaq. Axtarış funksiyası hazırda “OpenAI”nin Plus və “Team” planı abunəçiləri üçün əlçatandır. Digər istifadəçilər gələn aydan etibarən giriş əldə edəcəklər.

Yeni “Xiaomi Smart Band 9 Pro” təqdim edilib

“Smart Band” qolbaq seriyasının ən son üzvü olan “Xiaomi Smart Band 9 Pro” əvvəlki modellərdən fərqli olaraq modern ağıllı saat formasına malikdir. “Xiaomi”nin yeni geyilə bilən cihazı 336 × 480 piksel təsvir ölçülü 1,74 düymlük AMOLED ekrana malikdir. Korpusunda 350 mAh tutumlu akkumulyator daşıyan “Smart Band 9 Pro” 21 gün davamlı istifadə edilə bilir.

“Apple” “Final Cut Pro”ya yenilənmə gətirib

Yeni “Final Cut Pro” versiyası istifadəçilərə süni intellekt tərəfindən yaradılan video effektlərini dərhal tətbiq etməyə imkan verəcək. Yeni “Transcribe to Caption” funksiyası sayəsində istifadəçilər əhəmiyyətli vaxt və enerji qənaəti edərək video redaktəsini səmərəli hala gətirə biləcəklər.

“Nintendo” “Switch Online” abunəçiləri üçün musiqi proqramı hazırlayıb

“Nintendo” istifadəçilərə “Splatoon”, “Animal Crossing” və “The Legend of Zelda” daxil olmaqla son onillikləri əhatə edən “Nintendo” oyunlarından klassik oyun melodiyalarını dinləməyə imkan verən “Nintendo Music” adlı proqram hazırlayıb.

“Apple” yeni “M4” prossesorlu “Mac Mini”ni belə təqdim etdi

Bir həftədə fərqli günlərdə üç yeni Mac cihazlarını təqdim edən “Apple” hər cihaz üçün xüsusi təqdimat etdi. M4 çipi ilə təchiz edilmiş yeni “Mac Mini” modeli isə yaradıcı reklamı ilə diqqəti öz üzərinə çəkə bildi. Reklamda cihazın kompaktlığına rəğmən necə də funksional olduğuna və bununla da “Apple”ın ilk karbon neytral məhsulu olduğuna vurğu edilib.