Yaradıcılıq, texnologiya və startap sahələri üzrə gündəmdə olan xəbərləri buradan izləyə bilərsiniz. Bu günün xəbərləri ilə qarşınızdayıq, xoş oxumalar!
"Google" axtarış "widget"ı yenilənir!
"Google" "Android" cihazlarda geniş istifadə olunan axtarış "widget"ını yeniləyir. Yeni versiyada istifadəçilər rəng tonlarını dəyişərək tam fərdi dizaynlar yarada biləcəklər. Bundan əlavə, axtarış nəticələrini daha asan paylaşmağa imkan verən yeni düymə də əlavə olunur. Yeniliklər hazırda yalnız beta versiyasında mövcuddur, lakin tezliklə bütün istifadəçilər üçün əlçatan olacağı gözlənilir.
Avstraliyada 16 yaşdan kiçiklərə sosial media qadağası təsdiqləndi!
Avstraliya parlamenti 28 noyabr 2024-cü il tarixində qəbul etdiyi qanunla 16 yaşdan kiçik şəxslərin sosial media istifadə etməsini qadağan etdi. Qanunun qüvvəyə minməsi üçün 12 ay vaxt müəyyən edilib və bu müddət ərzində sosial media platformalarının yeni qaydalara uyğunlaşması tələb olunur. Tələblərə əməl etməyən platformalar ölkədə fəaliyyətini davam etdirə bilməyəcək. Yeni qaydalara əsasən, 16 yaşdan kiçik istifadəçilərin mövcud hesablarına görə cərimələr birbaşa sosial media şirkətlərinə tətbiq olunacaq. Qanunun məqsədi uşaqları sosial medianın zərərli təsirlərindən qorumaqdır.
"Casio" 41 ildən sonra "G-Shock" əfsanəsini yenidən tanıtdı
"Casio" 41 il əvvəl istehsal etdiyi məşhur "G-Shock" rəqəmsal saatını "DW-5000R" modeli ilə yenidən təqdim edib. Yeni model 1983-cü ildə buraxılan orijinal "DW-5000C" dizaynına tam sadiq qalaraq yenidən hazırlanıb.
Saatın korpusu 42.3 mm-ə qədər böyüdülüb və düymələri daha kompakt hala gətirilib. "DW-5000R" dekabrın 13-də Yaponiyada satışa çıxarılacaq, qlobal satışla bağlı isə hələlik məlumat verilməyib.
ABŞ Federal Ticarət Komissiyası "Microsoft"u araşdırır
ABŞ Federal Ticarət Komissiyası (FTC) "Microsoft"un bulud texnologiyaları, süni intellekt və kibertəhlükəsizlik sahələrindəki biznes fəaliyyətlərini araşdırmağa başlayıb. Araşdırma şirkətin bazar hökmranlığı və rəqabətə mane ola biləcək iddialar üzərində cəmlənib. "Microsoft"un "Azure" xidmətlərindəki lisenziyalaşdırma və qiymət siyasətinə dair tənqidlər də diqqət mərkəzindədir. Şirkət daha əvvəl Avropa Birliyində rəqib şirkətlərin şikayətləri ilə də üzləşmiş və bəzi razılaşmalar əldə etmişdi.
"Galaxy Tab S10 FE" rəsmi olaraq ortaya çıxdı
"Samsung"un ABŞ veb-saytında yayımlanan kampaniya, yeni "Galaxy Tab S10 FE" modelinin mövcudluğunu təsdiqlədi. Planşetin Wi-Fi və 5G variantlarının təqdim olunacağı, SM-X520 və SM-X526B model nömrələrinə sahib olacağı bildirilib. Təhsil və iş üçün ideal bir seçim olaraq tanıdılan cihaz, istifadəçilərə 1 illik pulsuz "Goodnotes" abunəliyi təklif edəcək.
Daha çox
Daily
kateqoriyasından
